ភ្នំពេញ៖ រយៈពេល២៧ឆ្នាំមកហើយ ដែលអង្គការសាលារៀនទន្សាយ (Rabbit School Organization ) បានផ្ដល់សេវាអប់រំដល់កុមារអូទីស្សឹម ដោនស៊ីនដ្រូន និងកុមារមានពិការភាពសតិបញ្ញានៅកម្ពុជា។ លោក វង្ស វុទ្ធី ប្រធានកម្មវិធីអង្គការសាលារៀនទន្សាយ បានលើកឡើងថា ក្នុងដំណើរដ៏វែងឆ្ងាយនេះ សាលារៀនទន្សាយ អាចពង្រីកការផ្តល់សេវាអប់រំរបស់ខ្លួន ពីរាជធានីភ្នំពេញ ទៅតាមបណ្ដាខេត្តបាន ដោយសារមានការគាំទ្រ ពីក្រសួងអប់រំ ក្រសួងសង្គមកិច្ច អង្គការដៃគូ ជាពិសេសអង្គការអេដ អេ អាកស្យុង។
ក្នុងបទសម្ភាសជាមួយសារព័ត៌មានឌីជីថលថ្មីៗ លោក វង្ស វុទ្ធី បានចាត់ទុកថា ការគាំទ្ររបស់អង្គការ អេដ អេ អាកស្យុង ក្នុងរយៈពេលជាង១៣ឆ្នាំមកនេះ ជាផ្នែកមួយដ៏សំខាន់ដែលជួយទៅដល់កុមារអូទីស្សឹម និងកុមារមានពិការភាពសតិបញ្ញា ដើម្បីឱ្យពួកគេទទួលបានការអប់រំពេញលេញដូចក្មេងដទៃ។
លោក វង្ស វុទ្ធី អះអាងដូច្នេះ៖ «អង្គការ អេដ អេ អាកស្យុង បាននៅជាមួយយើងរយៈពេល១៣ឆ្នាំ ដើម្បីធ្វើយ៉ាងណា ឱ្យសេវាកម្មអប់រំកុមារដែលមានតម្រូវការពិសេសនេះ ទទួលបានជោគជ័យ។ ក្រៅពីថវិកា អង្គការ ក៏បានជួយទាំងបច្ចេកទេស ក៏ដូចជាធនធានផ្សេងទៀត ដើម្បីធ្វើយ៉ាងណា ពង្រឹងទៅលើធនធានមនុស្ស ដែលកំពុងធ្វើការទៅលើផ្នែកអប់រំពិសេសនេះដែរ»។
បើតាមប្រធានកម្មវិធីរបស់អង្គការសាលារៀនទន្សាយ ក្រោមការគាំទ្រពី អង្គការ អេដ អេ អាកស្យុង អង្គការសាលារៀនទន្សាយ បានពង្រីកការផ្តល់សេវាអប់រំរបស់ខ្លួន ពីរាជធានីភ្នំពេញ ទៅកាន់សាលាចំនួន១៥ទៀត នៅក្នុងខេត្តកណ្តាល កំពង់ស្ពឺ និងសៀមរាប។ ក្នុងនោះមានកុមារអូទីស្សឹម ដោនស៊ីនដ្រូម និងកុមារមានពិការភាពសតិបញ្ញា ជាង៥០០នាក់ កំពុងទទួលសេវាអប់រំ ដោយមានកុមារជាង២០០នាក់ កំពុងសិក្សានៅក្នុងសាលាបឋមសិក្សាទួលគោក ក្នុងខណ្ឌទួលគោក រាជធានីភ្នំពេញ និងប្រមាណ៣០០នាក់ទៀត នៅតាមបណ្ដាខេត្ត៕
អត្ថបទដោយ៖ អ៊ុត រស្មី
ដកស្រង់ចេញពី គេហទំព័រ សារព័ត៌មានថ្មីៗ ចេញផ្សាយថ្ងៃទី០៣ ខែធ្នូ ឆ្នាំ២០២៤
