សៀមរាប៖ ក្រសួងអប់រំ យុវជន និងកីឡា បានសហការជាមួយអង្គការសហប្រជាជាតិ អ្នក ស្ម័គ្រចិត្ដ រៀបចំវគ្គបណ្ដុះបណ្ដាលថ្នាក់ជាតិមួយនៃកម្មវិធី «ការស្ម័គ្រចិត្ដដើម្បីសហគមន៍ខ្ញុំ ២០២៦- ឬកម្មវិធី ស.ស.ខ» នៅមជ្ឈមណ្ឌលជាតិយុវជនកម្ពុជាខេត្ដសៀមរាប កាលពីថ្ងៃទី ១១ ខែឧសភាកន្លងទៅ។ កម្មវិធីនេះ មានគោលបំណងផ្តល់ឱកាសឱ្យយុវជនតាមមូលដ្ឋាន ស្វែងរក និងផ្ដួចផ្ដើមនូវគម្រោងថ្មីៗ ដើម្បីចូលរួមនៅក្នុងការកសាង និងអភិវឌ្ឍសហគមន៍ដែលពួកគេរស់នៅ។
អង្គការអេដ អេ អាកស្យុង(Action Education) គឺជាដៃគូមួយ ដែលបានគាំទ្រនៃកម្មវីធី «ការស្ម័គ្រចិត្ដដើម្បីសហគមន៍ខ្ញុំ ២០២៦»នេះ។ ក្នុងបទសម្ភាសជាមួយសារព័ត៌មានឌី ជីថលថ្មីៗ លោក វន សំភាស់ ប្រធានអង្គការអេដ អេ អាកស្យុង បានប្រដូចកម្មវិធីនេះ ដូចជាវេទិកាមាស ដែលផ្ដល់ឱកាសឱ្យយុវជន អាចពង្រឹងសមត្ថភាពបន្ថែម និងបន្ត អភិវឌ្ឍន៍ចំណេះជំនាញខ្លួន ឱ្យក្លាយជាធនធានរបស់ជាតិ ដែលអាចចូលរួមចំណែក អភិវឌ្ឍសហគមន៍ និងប្រទេសជាតិ។
សូមជម្រាបថានេះ ជាគឺជាឆ្នាំទី៧ហើយដែលកម្មវិធី «ការស្ម័គ្រចិត្ដដើម្បីសហគមន៍ខ្ញុំ ២០២៦» ត្រូវបានរៀបចំឡើង ពោលគឺចាប់តាំងពីឆ្នាំ២០១៩មក។ លោក វន សំភាស់ ប្តេជ្ញាថា អង្គការអេដ អេ អាកស្យុង នឹងនៅតែបន្តគាំទ្រកម្មវិធីនេះ ដើម្បីជាចំណែកនៅក្នុងការបណ្តុះធនធានមនុស្សកម្ពុជាដែលមានសមត្ថភាព ហើយពួកគេ នឹងក្លាយ ជាមូលធន ដែលអាចជំរុញសំទុះសេដ្ឋកិច្ច និងសង្គមជាតិ ទៅថ្ងៃអនាគត៕
អត្ថបទដោយ៖អ៊ិវ ផានិត និង ថោង ប្រណី
ដកស្រង់ចេញពី គេហទំព័រ សារព័ត៌មានថ្មីៗ ចេញផ្សាយថ្ងៃទី៣០ ខែឧសភា ឆ្នាំ២០២៦
