ភ្នំពេញៈ ៦ ខែក្នុងឆ្នាំនេះ គម្រោង CCOOSC បានផ្តល់ការកសាងសមត្ថភាពគ្រូបង្រៀន និងតួអង្គអប់រំជាង ៦ ០០០ នាក់ ខណៈគ្រូបង្រៀនដែលមានលក្ខណសម្បត្តិគ្រប់គ្រាន់ និងទទួលបានការបណ្តុះបណ្តាលវិជ្ជាជីវៈ ត្រូវបានរកឃើញថា អាចជួយកុមារទាំងអស់ឱ្យរៀនសូត្របានល្អ។
អង្គការ Aide et Action បានឱ្យ ភ្នំពេញ ប៉ុស្តិ៍ ដឹងថា ក្នុងរយៈពេល ៦ ខែ ដើមឆ្នាំ ២០២៣ នេះ កម្មវិធីដៃគូរួមគ្នាផ្តល់ឱកាសអប់រំដល់កុមារបាត់បង់ឱកាសនៅកម្ពុជា (CCOOSC) បានសហការជាមួយ Education Above All តាមរយៈ Educate a Child ដឹកនាំដោយ Aide et Action បានផ្តល់ការអភិវឌ្ឍសមត្ថភាពដល់គ្រូបង្រៀន និងតួអង្គអប់រំសរុបជាង ៦ ៣០០ នាក់។
Aide et Actionបានឱ្យដឹងទៀតថា ក្នុងនោះ តួអង្គអប់រំជាង ១ ៨០០ នាក់ ដែលភាគច្រើនជានាយកសាលា និងមន្ត្រីការិយាល័យអប់រំខេត្ត បានចូលរួមក្នុងសកម្មភាពអភិវឌ្ឍន៍វិជ្ជាជីវៈជាង ១៤៨ វេទិកាសិក្សានិងកម្មវិធីសិក្ខាសាលា។
Aide et Action បានបញ្ជាក់ថា៖ «ច្រើនជាង ១៦៨ កម្មវិធីអភិវឌ្ឍន៍វិជ្ជាជីវៈ លើប្រធានបទដូចជា ការអប់រំបរិយាប័ន្ន បំណិនជីវិត ការអប់រំក្រៅផ្លូវការ/ពិសេស ការត្រួតពិនិត្យតម្រូវការពិសេស និងវិធីសាស្ត្របង្រៀន ត្រូវបានផ្តល់ជូនសម្រាប់គ្រូបង្រៀនបឋមសិក្សាជាង ៤០០ នាក់។ សកម្មភាពទាំងនេះត្រូវបានទទួលដោយការសាទរពីគ្រូបង្រៀន និងសិស្សានុសិស្ស»។
លោក វន សំភាស់ នាយកប្រចាំកម្ពុជានៃអង្គការ Aide et Action បានឱ្យដឹងថា នៅកម្ពុជាសមត្ថភាពគ្រូបង្រៀនកម្រិតបឋមនៅតែជាឧបសគ្គមួយក្នុងវិស័យអប់រំ ពិសេសនៅជនបទ និងតំបន់ដាច់ស្រយាល។
លោកបានបន្តថា ការបណ្តុះបណ្តាលប្រកបដោយប្រសិទ្ធភាពសម្រាប់គ្រូបង្រៀន និងតួអង្គអប់រំ (តួអង្គអប់រំ៖ មនុស្សដែលធ្វើការក្នុងវិស័យអប់រំ) មានសារៈសំខាន់ណាស់ក្នុងការរក្សាកុមារមករៀននៅសាលា។ លោកថា នៅពេលគ្រូបង្រៀនមានលក្ខណសម្បត្តិគ្រប់គ្រាន់ ពួកគាត់អាចជួយកុមាររៀនសូត្របានល្អ។
លោកបានបញ្ជាក់ថា៖ «កញ្ចប់កម្មវិធីសិក្សាថ្នាក់បំប៉ន កម្មវិធីបំណិនជីវិត ការប្រឹក្សាកុមារី ឧបករណ៍តាមដានទិន្នន័យមូលដ្ឋាន ការអប់រំពិសេស វិធីសាស្ត្របង្រៀនសម្រាប់កម្មវិធីពហុភាសា ការគ្រប់គ្រងបណ្ណាល័យ ផែនការប្រតិបត្តិការប្រចាំឆ្នាំរបស់សាលារៀន និងការពិនិត្យមើលចក្ខុវិស័យគឺជាប្រធានបទដែលមានក្នុងវគ្គបណ្តុះបណ្តាលនេះ»។
លោក យី ខប នាយកសាលាបឋមសិក្សាប្រាសាទ ក្នុងស្រុកពួក ខេត្តសៀមរាបបានថ្លែងថា បន្ទាប់ពីទទួលបានការគាំទ្រពីគម្រោងឃើញថា សាលាបឋមសិក្សាប្រាសាទកំពុងផ្លាស់ប្តូរលទ្ធផលថ្មីរួមមាន បរិយាកាសសាលាបានផ្លាស់ប្តូរជាពណ៌បៃតង សាលាបានសាងសង់ដំបូលដើម្បីចម្រោះទឹកសម្រាប់សិស្សជួសជុលសួនច្បារ សាលារៀន សាងសង់ឡដុតសំរាម កន្លែងដាក់សំរាមតាមប្រភេទផ្សេងគ្នា និងបង្គន់អនាម័យ ជាដើម។
លោកបានបន្ថែមថា ចំណែកគ្រូបង្រៀនភាគច្រើនពេញចិត្តនិងចូលរួមក្នុងសកម្មភាពគម្រោងស្របពេលសមត្ថភាពរបស់សិស្សក៏កើនឡើងផងដែរ បន្ទាប់ពីទទួលបានកម្មវិធីសិក្សាបំប៉ន អត្រាបោះបង់ការសិក្សាក៏កាត់បន្ថយ ហើយឪពុកម្តាយភាគច្រើនជឿជាក់លើគណៈកម្មការគ្រប់គ្រងសាលា។
លោកថា៖ «កាលពី ២ ឆ្នាំមុន បរិយាកាសនៅសាលារៀនខ្ញុំនៅមានកម្រិតនៅឡើយ គ្មានទីធ្លាសាលារៀនប្រកបដោយផាសុកភាព គ្មានកន្លែងចោលសំរាម គ្មានកន្លែងសម្រាប់សិស្សដាក់កង់ សិស្សជាច្រើនចុះឈ្មោះចូលរៀនយឺត ហើយគុណភាពនៃការអប់រំសិស្សកាន់តែយ៉ាប់យ៉ឺនដោយសារជំងឺកូវីដ ១៩ មានសិស្សរៀនយឺតច្រើន ខ្វះសម្ភារសិក្សា ខ្វះទឹកពិសាមានសុវត្ថិភាព»៕
អត្ថបទដោយ៖ ឡុង គីមម៉ារីតា
ដកស្រង់ចេញពី គេហទំព័រ ភ្នំពេញប៉ុស្តិ៍ ចេញផ្សាយថ្ងៃទី៣១ ខែកក្កដា ឆ្នាំ២០២៣
